எடுத்த காரியம் எளிதாக - வெற்றியாக முடிய வேண்டும் என்ற ஆசை அனைவருக்கும் உண்டு. அந்த ஆசையை நிறைவேற்றிவைக்கும் கடவுள் விநாயகரே என்ற நம்பிக்கை ஒவ்வொருவர் உள்ளத்திலும் நிலைத்திருக்கிறது. தமிழரின் வழிபாட்டில் விநாயகர் வழிபாடு தொன்மையானது. சங்க இலக்கியங்களில் விநாயகர் பற்றிய குறிப்புகள் இல்லை. "உரையாசிரியர்' என்று அழைக்கப்படும் இளம்பூரணர் செய்யுளியல் உரையில் "தன்தோள் நான்கில்' என்ற அகவலை எடுத்தாள்கிறார். விநாயகர் வழிபாட்டில், பிள்ளையார்பட்டி கற்பக விநாயகர் வழிபாடு உலகெங்கும் பரவியுள்ளது.

இங்குள்ள பிள்ளையார் உலக மக்களின் நன்மைக்காகச் சிவலிங்கத்தைக் கையில் வைத்துத் தவம் புரியும் முகமாக வீற்றிருப்பதால் இவ்வூர் பிள்ளையார்பட்டி என்று அழைக்கப்படுகிறது.

பிள்ளையார்பட்டி அருள்மிகு கற்பக விநாயகர் திருக்கோயிலில் நாள்தோறும் ஐந்து காலப் பூசைகள் நிகழ்கின்றன. திருஅனந்தல் காலை 6.00 மணி முதல் 6.30 மணி வரையிலும், காலைச் சந்தி காலை 8.30 மணி முதல் 9.30 மணி வரையிலும், உச்சிக்காலம் காலை 11.00 மணி முதல் 12.00 மணி வரையிலும், சாயரட்சை மாலை 5.00 மணி முதல் 6.30 மணி வரையிலும், அர்த்த யாமம் இரவு 8.00 மணி முதல் 9.00 மணி வரையிலும் நடைபெறுகின்றன.

ஒவ்வொரு சதுர்த்தியன்றும் விநாயகருக்கு அபிடேக ஆராதனை நடைபெறும். இரவு, வெள்ளி மூஞ்சுறு வாகனம் வலம் வரும் நிகழ்ச்சி உள்பிரகாரத்தில் நடைபெறும். திருக்கார்த்திகை மற்றும் திருவாதிரைத் திருநாளன்று விநாயகருக்கும், மருந்தீசருக்கும், நடராசருக்கும் சிறப்புப் பூசைகளும், அபிடேக ஆராதனைகளும் நிகழும்.

பிள்ளையார்பட்டியில் இத்திருவிழா பத்து நாள்கள் மிகச்சிறப்பாக நடைபெறுகின்றது. விநாயகர் சதுர்த்திக்கு ஒன்பது நாள்கள் முன்பாகக் காப்புக்கட்டிக் கொடியேற்றித் திருவிழா தொடங்கப்படுகிறது. ஒவ்வொரு நாள் இரவிலும் விநாயகருக்கு மூஞ்சுறு, சிம்மம், பூதம், கமலம், இடபம், யானை, பெருச்சாளி, மயில், குதிரை வாகனங்களில் திருவீதியுலா நடைபெறும். கற்பக விநாயகருக்கு, சதுர்த்தியன்று 18 படி அரிசிமாவினால் செய்யப்படும் கொழுக்கட்டை நிவேதனமாகப் படைக்கப்படுகிறது.

ஒவ்வொரு ஆண்டும் ஆவணி மாதம் சுக்கிலபட்சத்தில் வருகிற சதுர்த்தியன்று, விடியற்காலையில் எழுந்து நீராடி, பட்டாடை உடுத்தி, ரத்னகலச ஸ்தாபனம் செய்து, கும்பத்தில் விநாயகரை வணங்கி, கரும்பு, விளா பழம், சர்க்கரை, பலாப்பழம் ஆகியவற்றை நிவேதனம் செய்து வழிபட வேண்டும். பகலில் ஒருவேளை உண்டு இரவில் பால் (அ) பழம் மட்டும் உண்டு விரதம் இருத்தல் வேண்டும். அன்று இரவில் சந்திரனைப் பார்க்கக்கூடாது. சதுர்த்தியன்று விரதம் இருந்து வரும் பக்தர்கள் அதனை நிறைவு செய்யப் பிள்ளையார்பட்டி வருவர். ஓராண்டுச் சதுர்த்தி நோன்பு விரதத்தை இங்கு நிறைவு செய்பவர்களுக்குக் கேட்ட வரம் கிடைக்கின்றது என்பது நடைமுறையில் கண்ட உண்மையாகும்.

விநாயகர் சதுர்த்தி என்றதும் கொண்டாட்ட உணர்வு வருவதற்குப் பதில் இப்போதெல்லாம் வன்முறை ஏற்பட்டுவிடுமோ என்ற பயமே மேலோங்குகிறது.

ஆயிரக்கணக்கான பிள்ளையார்களை கிணறுகளிலும், ஏரிகளிலும், குளங்களிலும், கடலிலும் கரைப்பதால் சுற்றுச்சூழல் மாசுபடும் அபாயம் அதிகத்து வருகிறது. முன்பெல்லாம் களிமண்ணில் மட்டும் தான் பிள்ளையார் உருவங்களைச் செய்தனர். தற்பொழுது பிளாஸ்ட்ரோ பாரீஸில் செய்த நச்சுத்தன்மையுள்ள வண்ணங்கள், வார்னிசுகள் பூசப்பட்ட பிள்ளையார்கள் அதிகத்துவிட்டன. இதனால் நீர் மாசுபடுவதுடன், நீர் வாழ் உயிரினங்கள் அழியும் சூழல் ஏற்படுகிறது. உற்சவ மூர்த்திகள் வலம் வருதல் சக உயிர்களை அழிக்கஅல்ல; மகிழ்விப்பதற்கே என்பதை மக்கள் உணரவேண்டும்.

குடைவரைக் கோயிலிலுள்ள விநாயகரின் சிற்ப அமைதியையும், பழமையான கல்வெட்டினையும் கொண்டு உலகின் முதன்மையான விநாயகர் கோயிலாகப் பிள்ளையார்பட்டிக் கற்பக விநாயகர் கோயில் திகழ்கிறது. வடக்கு நோக்கியவாறு தனது வலது கரத்தில் இலிங்கத்தை வைத்து அமர்ந்த நிலையில் உலக நன்மைக்காகத் தவம் புரியும் விநாயகர் திருக்கோலத்தை வேறு எங்கும் காணஇயலாது. விநாயகரின் தும்பிக்கை வலப்புறமாக "ஓம்' எனும் பிரணவத்தைப் போல அமைந்திருப்பது தனிச்சிறப்பாகும். விநாயகரின் திருமுகத்துடன் கூடிய வலதுபுறத் தும்பிக்கை, ஓங்காரத்தை வலியுறுத்துகிறது.

இங்குள்ள நடராசன் செப்புத் திருமேனியில் உள்ள டமாரத்தைத் தட்டினால், உண்மையான டமார ஒலி கேட்கிறது.